اول شرارة جت من شرقينا ........من بر بنغازي بدت تبان
قالو المحامي غاب مختطفينه ........راجل نطق بالحق موش جبان
وفزعت البيضا مارضت بالشينة .........وفي الساحة بدو يتوافدو الشبان
وين ماسمعنا صوتهم فزينا ........والتمت الرجبان في الميدان
طقينا طبول الحرب واستنينا .......واعلنا الجهاد في كل رفع اذان
ولا كان مطلبنا منين بدينا .......تحسين وضعنا المتهالك التعبان
ولاقلنا نبوا تعديل في قوانينه .......ولانبدلوه فلان بعلان
طلبنا طلب واحد عليه نوينا .......يسقط معمر قايد الجردان
تي من اليوم الاول صوتنا علينا .......من طيحة اول شهيد في الميدان
فيسع بعدها تشابكت ايدينا .......مع خوتنا واحبابنا الزنتان
وقبائل البربر صعب ترخي بينا .....عارفينهم من خيرة الفرسان
فيسع الفوا في جبلنا التمينا ........ومعاهم شعرنا الحق بالامان
من يفرن اليا نالوت من غربينا .........اعلنا استقلنا بعزم وبايمان
لاقدرت كتيبة تخش لارضينا ........ولاجيش من عبدا لونهم يدكان
جبلنا عفيف وناسنا حرسينه .......سكانك صقورا ياجبل اطمان
وفي الزاوية رينا ملاحم زينة ......التاريخ ليها ينحني يا اخوان
ومصراتة الابية بالتريس حصينة ........ويردوا الغازي اليا خشها موهان
والله مايكفي شهور كان حكينا .........علي مجدكم يا ابطال يا شجعان
وياطرابلس جينا لامانسينا ......انتي العاصمة والدم في الشريان
انتي فداك ارواحنا التمينة ..........وانتي بلاك الوطن ماله شان
وعيب نفرحوا وعيبين كان زهينا ........وانت اسيرة ف حظن هالحيوان
ياطرابلس جيينا واستنينا ......خلاص الفرج قرب هوينه بان
عظيم ربنا رحمان مايخلينا ......والنصر راهو فضل من الرحمان
ووين مارفعنا للسماء ايدينا ...........مش شكر ف فرنسيس وامريكان
شكرنا اللي بحكمه يسير فينا .........اللي كل شئ يسير بادنه ياسبحان
ويالله صلوا معاي علنبينا .........صلاة معطرة بفل وبريحان
